Empleyado sang City Legal Office sang Bacolod natalana nga papanaogan sang show cause order bangud sa pagwaslik puder; isa pagid ka kaangay nga insidente gina-usisa na sang siudad.
Ginsumite na ni Bacolod City Legal Officer Karol Joseph Chiu kay Mayor Greg Gasataya ang draft sang show cause order para sa isa ka empleyado nga ginapatihan nagawaslik puder sa isa ka ilimnan sa siudad.
Sandig sa imbestigasyon sang CLO, isa ka lalaki nga regular employee ang natungdan. Siya ang kabahin man sang Joint Inspection Team sang City Legal Office nga kuntani naga-inspect sa mga business permits sang mga negosyante.
Ginsiling ni Chiu, nga natabo ang insidente sang ulihi na nga semana sang Hunyo sa isa ka ilimnan sa Goldenfield Commercial Complex kun sa diin nagpakilala ang empleyado nga katapo sang CLO agud malibre ang iya mga ilimnon.
Matapos ang insidente, ginreklamo man mismo sang empleyado sang ilimnan ang natungdan, kag ini ang gilayon nga nakilala sang CLO.
Temporaryo nga wala anay gina paupod ni Chiu sa Joint Inspection Team ang natungdan nga empleyado samtang nagapadayon pa ang imbestigasyon may angut sa insidente.
Natalana nga i-serbe sa iya ang show cause order.
Samtang, may isa pagid ka kaangay sini nga insidente ang sa karun gina-usisa pa sang CLO. Wala pa sang pat-ud nga detalye ang separado nga insidente.
Nagpasiguro man si Chiu nga manabat ang empleyado nga nagawaslik puder, bisan pa nga empleyado sila sang City Legal Office.
[sibwp_form id=1]