Katapo sang Federation of Urban Poor ukon FED-UP Negros ang naghalad sang bulak sa istatwa ni anay Senador Benigno Ninoy Aquino, Jr., kaina sang aga sa dalan Araneta.
Ini sa pagdumdom sang ika – 39 nga anibersaryo sang EDSA People Power Revolution.
Suno kay Joy Jarabelo ang pamuno sang FED-UP Negros Occidental, subong nga adlaw 39 ka tuig ang nagligad, minilyon ka baganihan nga Pilipino ang nagpanindugan batuk sa diktadurya.
Wala labot sa paghalad sang bulak sa monumento ni Aquino, may caravan man nga gin patigayon padulong sa Barangay Bata kun sa diin sila ang nag tambong sang misa sa Our Lady of Lourdes Parish.
Sa misa nga gin officiate ni Fr. Aniceto Mao Buenafe, iya man gin handuraw ang EDSA kag ang kabuhi ni Ninoy nga nag sakripisyo para sa pungsod.
Ginsiling man ni Jarabelo nga gin pasalamatan ni Fr Mao ang FED-UP sa pagpadayon sang pagdumdom sang EDSA apesar nga ang administrasyon karon nag proklamar sini bilang special working holiday.
Suno kay Jarabelo ang EDSA pagpakita sang pagkabaganihan sang ordinaryo nga Pilipino.
May kaangtanan sa ginapaabot nga piniliay suno kay Jarabelo, may mensahe sila sa mga kandidato, nga dapat usisaon nila ang ila konsiyensya.
Sa mga yara sa position nga wala man lang sang binuhatan nga maayo indi na lang magpapili.
Sa mga bumuluto dapat dumdumon nga ang public office is a public trust.
Kinahanhlan ang yadtong masaligan.
Ang kwarta kag ayuda indi dapat ang mag pat-od sang boto suno kay Jarabelo.