Isa ka doktor sa siudad sang Bacolod ang napatay bangud sang COVID-19 bisan pa nga nakumpleto niya na ang ikaduha niya nga dose sang bakuna.
Makit-an sa post ni Dr. Hector Gayares sa iya social media account ang pagtaliwan sang iya abyan nga si Dr. Julian Rizaldy Raca bangud sang COVID-19.
Si Raca ang isa ka medical frontliner nga miembro sang medical community sa Bacolod.
Ginpahayag ni Dr. Chris Sorongon sang Bacolod Emergency Operations Center nga natapos na ni Raca ang iya second dose sang bakuna antes ang iya pagtaliwan.
Ugaling bangud may yara ini sang iban nga balati-an ukon ginatawag nga comorbidity, nag angkon ini sang virus kag naglain ang kondisyon sa ospital.
Suno kay Sorongon, ini ang nagapakita lamang nga bisan pa nga nabakunahan ang isa ka persona may posibilidad ini sa gihapon nga malatnan sang virus ilabi na ang mga may ginabatyag nga masakit.