Duha ang patay sa separado nga insidente sang pagpaniro sa Barangay Bata kag Vista Alegre sa Bacolod.
Nagapungko lang sa iya ginabyahe nga tricycle ang biktima nga si Mark Rouven Sison, 39 anyos sang gintiro sang gunman nga nagpakuno-kuno food delivery rider sa Purok Pepsi Zone 1 sa Barangay Bata kagab-i.
Si Sison ang nag-angkon sang mga pilas sa lawas tuga sang igo sang bala sang pusil nga nagresulta sa iya kamatayon. Nakapalagyo ang wala makilal-an nga gunman.
Ginpat-od pa sang katapo sang Police Station 3 kun may kaangtanan sa iligal nga droga ang motibo sa pag tiro matapos may na recover ang kapulisan sa iya sini nga bag nga mga paraphernalia nga ginagamit sa pag-repack sang shabu.
Samtang, isa man ka lalaki nga ginkilala kay Reman Quiñanola ang nasapwan nga patay kag may pilas sa ulo sa katubuhan sa Barangay Vista Alegre.
Ginsiling ni Police Station 7 Commander Police Captain Dax Santillan, nga ila pa ginapat-ud kun gintiro ukon ginlampuwasan ang biktima nga taga Kabankalan City.
Nagkig-angut sa pamilya sang biktima ang kapulisan agud mahibaluan kun ngaa nag-byahe ini pa-Bacolod kahapon antes pa man nga nasapwan.