Nag amat amat naman gid damo ang naga binakal sang bulak karon nga duha na lang ka adlaw ang nabilin kag temporaryo na nga sirad-an ang mga patyo.
Suno kay Nene Alibutdan mga tatlo ka adlaw na nga nangin maayo ang baligyaanay sang bulak.
200 pesos ang round kag flat spray nga floral arrangement, 500 pesos naman ang one sided. Suno kay Nene kun luyag sang customer nga mas damo pa gid ang bulak pwede sa gihapon ini, may dugang lang sa balayran.
“Sa subong nami naman ang baklanay kay damo naman ang customer nga nagakadto. Nagapili man lang sila sang ila nga magustuhan. Nag mahal ang bulak subong. Halin sa puno nga daan mahal na siya. Diri sa amon amo man na,” suno kay Alibutdan.
Sa Burgos Public Market masako na ang galingan.
Madamo na ang naga pagaling sang pilit para sa natalana nga handa sa pista minatay.
Mabakal naman ang lubi suno kay Jonathan Panganiban para sa gata nga masami ginagamit sa mga native nga pagkaon nga ginahanda kada Nobyembre 1.
Si Gina Vista naman may mga order na nga nabaton gikan sa iya nga mga suki. Ibos, puto, kalamayhati kag suman latik ang iya nga mga ginabaligya.
“Damo gid kami luto kun mag kalag kalag,” suno kay Vista.
Samtang, pilit ang ginapaabot naman ng mangin mabakal sa masunod pa nga inadlaw suno sa manugbaligya.