Padayon ang pag luntad sang landslide sa bahin sang bukid sakop sang Camp Valdez sa Mambaroto sa Sipalay City.
Mas nag daku pa gid ang damlag pa cracks nga nakit-an diri.
Ini suno kay Sipalay City Disaster Risk Reduction Management Office coordinator, Dionilo Bogtae nga nag siling nga base sa exit conference upod sa Mines and Geosciences Bureau active kag progressive ukon nagapadayon ang landslide.
Ini ang naga kinahanglan sang gilayon nga aksyon kag padayon nga monitoring.
Sa mga key findings nakasaad nga sang October 18 to 19, ang kalaparon sang mga crack nga nakit-an yara sa 10 inches kag may kadalumon nga 9 feet.
May mga seepage kag groundwater flow man nga na detect.
Sang October 26, ang mga crack mas nag lapad tubtob na sa isa ka metro, may mga bag-o pa gid nga mga crack nga nakit-an. Ang apektado nga area gina bulubanta yara sa 4,967 square meters.
May mass movement man nga nakit-an nga nga padayon ilabi na kun may pag tupa sang mabunok nga ulan.
Sini nga Martes suno kay Bogtae may nakita sila nga mga crack sa canal sa kilid sang highway.
Sang Domingo lamang nahuman ang geo-resistivity kag ground penetrating radar survey sang team gikan sa MGB. Ang resulta sini ang ila nga ipadala pa sa ila nga regional office.
Sa karon suno kay Bogtae gina regulate nila ang traffic sa apektado nga highway.
Gina isa-isa lamang palabay ang mga dalagko kag kargado nga mga salakyan.
“Bag-o lang ko to halin so may nakita na ko to nga mga crack along gid sa national highway pero indi gid siya sa dalan, but ang diri sa kilid sang iya nga concrete canal sa kilid sang highway. May ma part na nga nag crack kag bag-o kita nga nakita nga mga cracks kag landslide nga part didto sa babaw nga area”, suno kay Bogtae.*