Bacolod LGU magahulat sang assessment sa nangin madinalag-on nga dry run sang E-Jeep sa Barangay Vista Alegre sa Bacolod.
Ginatun-an na sang siudad ang mga tikang agud matugyan sa mga modernized jeepney cooperative ang mga ginaplano nga green routes sa siudad sang Bacolod.
Ginsiling ni Mayor Albee Benitez nga nangin madinalag-on ang 5-day dry run sang mga e-jeep nga ginpatuman sa Barangay Vista Alegre.
Pero magahulat siya sang assessment sang resulta sang dry run antes i-recommend sa konseho ang possible nga amendment sa Local Public Transport Route Plan sang siudad.
Tuyo sang alkalde nga mapat-ud ang mangin epekto sang pagtalana sang e-jeep terminal sa mga pasahero kag subong man sa mga naga-operate nga mga tricycle operators and drivers association.
Duha ka mga green route ang plano itukod sang Bacolod LGU, nalakip na diri sa Barangay Vista Alegre kag Cabug.
Plano sang siudad nga magdugang sang rota agud masabat ang hinyo sang mga residente ilabi na ang mga nagapuyo sa relocation site.