Ginsulod sang agents sang Philippine Drug Enforcement Agency ang isa ka ginakabig drug den sa Purok 1, Barangay 7 sa Kabankalan City.
Tatlo ka mga persona nga naabtan sang otoridad nga yara sa sulod sang kwarto kag ginpangdakup.
Sila ang ginkilala sa mga alyas nga “Mark”, 35-anyos; “Cherrylyn”, 37-anyos; kag “Richard”, 33-anyos, tanan residente sang Kabankalan.
Nakumpiskar sang otoridad ang 10 ka pakete sang ginasuspetsuhan shabu, buy-bust money, drug paraphernalia kag cellphone.
Ang mga gin-aresto ang nagapangatubang sang kaso nga pagsupak sang Republic Act 9165 ukon Comprehensive Dangerous Drugs Act of 2002.
Ginpatigayon ang buy-bust sang katapo sang PDEA-NIR Regional Special Enforcement Team, PDEA Negros Occidental Provincial Office, Kabankalan City Police Station kag Coast Guard Intelligence Unit Southern Negros Occidental.