Gindeklarar sa ospital nga dead on arrival ang driver sang ambulansya sang South Bacolod General Hospital nga si Jessie James Tranilla matapos mabungguan sang isa ka SUV iya ginamaneho nga ambulansya.
Sandig sa imbestigasyon sang traffic section sang Police Station 1, nabungguan sang SUV ang ambulansya sa intersection sang dalan Lacson kag San Sebastian, Barangay 32, Bacolod City mga ala una kinse sini nga hapon.
Bangud sang kakusog sang pagkabunggo natumba ang ambulansya kag nagbunggo man ini sa isa ka panel van.
Gindala man sa ospital ang pasyente sang ambulansya pati na ang nurse kag auxiliary matapos masamaran sa insidente.
Gindetain sa police station ang driver sang SUV kag mahimo magapangatubang sang kaso nga Reckless Imprudence Resulting in Homicide and multiple injuries.
Indi pa sa karon makapahayag ang traffic investigator kun sino ang may sala sa pagbunggu-anay sang tatlo ka mga salakyan.