Apisar sa pagduso sang Bacolod City nga mangin pinakauna nga siudad sa Pilipinas nga may Waste To Energy Facility, may mga environmental groups kag advocates ang nagapamatok sa amo nga programa.
Ginsiling ni Councilor Al Espino, pamuno sang Committee on Laws, Ordinances, and Good Governance nga handa ang Sanguniang Panlungsod nga magpakigsugilanon sa ila agud mabatian pagid ang ila mga ginapakigbato.
Ang green house gas emissions nga sarang ma produce sang ipatukod nga planta amo ang ginapamalabagan sang mga environmental advocates.
Ginklaro man ni Espino nga ang ginpirmahan ni Bacolod City Mayor Greg Gasataya kag sang Forza Development Corporation amo ang lease agreement lamang sa BIRTH Facility sa Barangay Felisa kag wala pa sang pasilidad nga ipatukod sa karon.
Department of Energy lamang ang makahatag sang permiso sa Forza Development Corporation kun kwalipikado sila nga magpatindog sang planta sa Bacolod kag kon san-o posible sugodan ang pagdevelop sini.
Sandig sa 25-year lease agreement, 1 million per year ang renta sang Forza sa 10 ka hektariya nga duta sang siudad. Magluwas sini, may porsyento man nga makuha ang siudad sa income sang planta kon tigayon na ini nga mangin operational.
Dugang pa ni Espino, kinahanglan nga may ubrahon ang siudad agud madispose ang basura, kag ang WTE suno sa iya, ang isa sa epektibo nga solusyon.
Nagapamatok naman diri ang environmentlist groups bangud ang WTE incinerators ang nagadala sang pollution.*
[sibwp_form id=1]