Gina tughungan pa lang ang ini nga mga tangke sang oxygen may mga ngalan na kun kay sin-o ini nga ginpa reserve.
Sumugod sang nag ligad nga semana na deparahan na sang tagdumalahan sang Central Gas Corporation ukon CEGASCO ang hinali nga pagsaka sa demand sa oxygen.
Sa idalom may mga salakyan kag ambulansya nga naga hinulat para magkuha sang ila tangke.
Suno sa administrative officer sang CEGASCO nga si Mary Dazo, sa kwarenta niya ka tuig nga pag trabaho diri, subong lang siya naka experience sang amo sini nga sinakuay.
Bisan kaagahon may naga pinananawag nga mapa deliver sang oxygen. May mga walk ins man nga naga sinulod kay may mga pasyente sa ila nga mga balay.
Ang ambulansya sang Barangay Singcang Airport ang nagpadulong man diri. Nag bakal naman sila sang supply sang oxygen para sa ila nga barangay kay may mga Covid-19 patients kuno nga yara lang sa ila nga balay kag naga hulat nga may mag bakante nga ospital. Naga pangayo sila sang bulig sa barangay para sa supply sang oxygen.
Sang Biyernes kag Sabado nag pilahay na ang mga salakyan nga naga bakal sang oxygen suno sa mga empleyado. Domingo nga dapat kun tani sirado sila, napilitan sila nga mag bukas kay may walks ins.
Suno kay Rolando Pontino ang production manager sang CEGASCO, indi man nila ma indian ang mga ambulansya nga naga sulod sa ila planta nga may karga pa nga pasyente.
Gina limitahan pa gid kuno abe sang supplier nila gikan sa Cebu ang ginapadala diri nga oxygen kay gina kulang na didto.
Ang mga empleyado halos wala na tulog para lang ma tagaan sang supply ang naga kinahanglan. Masubo kuno pamatian ang alegasyon nga naga hoarding sila.
Ang CEGASCO ang isa lamang sa apat ka mga supplier sang oxygen sa Negros Occidental. Mga ospital sa Bacolod kag out of town ang ila gina cater.
Ang Department of Trade and Industry ang nag pagwa sang pahyag nga as of last week nila nga monitoring wala pa gina kulang ang supply sang oxygen sa probinsya.