Rep Alfredo Abelardo Benitez nagpanindugan nga dako ang posibilidad sa pag postpone sang BSKE sini nga tuig apisar sa nagahilapit na nga filing sang COC; Benitez ginpanginwala ang posibilidad nga si VM Kalaw ang iya suportahan sa 2028 bilang mayor sang Bacolod.
Wala pa sang pag-istoryahanay sa kampo nila ni Bacolod City Lone District Representative Alfredo Abelardo Benitez kun may ipa kontra bilang mayor sang siudad sa 2028 election.
Suno kay Benitez, wala pa sa pamensaron sang mga nagapungko sa karun sa Bacolod ang pulitika bangud madamo pa sang proyekto nga ila kinahanglan ipatuman antes ang 2028.
Ginpanginwala man niya ang posibilidad nga si Vice Mayor Jesus Claudio Puentebella ang magapapili bilang mayor sa ila nga kampo sa 2028. Suno sa iya indi ini matabo.
Ini matapos nga madamo sang nagapamangkot sa social media kun ngaa daw wala sila nagaupdanay ni Bacolod City Mayor Greg Gasataya. Dugang ni Benitez, padayon sa gihapon ang pagbuligay nila ni Gasataya sa pagpatuman sang mga proyekto sa siudad.
Samtang, ginsiling man niya nga laban-laban ma-postpone gid ang barangay kag Sangguniang Kabataan election ukon BSKE sini nga tuig.
Sang Setyembre 8, gin-aprubahan na sang House of Representative ang House Bill No. 10971 agud mangin lima na katuig ang termino sang mga barangay officials. Kaupod sang sini nga transition, iga-postpone man ang BSKE sini nga tuig sa ikaduha nga lunes sang Nobyembre 2028.
Apang, samtang wala pa sang laye nga napasa may angut sa postponement, magapadayon ang filing sang Certificate of Candidacy sa Setyembre 28 tubtob Oktubre 5, sandig sa schedule sang COMELEC.
[sibwp_form id=1]