Indi oil spill ang kabangdanan sang pag-itom sang tubig sa creek gikan sa Barangay Bata tubtob Barangay Banago sa Bacolod City, kundi mga basura kag lutak nga nagabara sa alagyan sang tubig.
Sandig sa pagpang-usisa sang City Legal Office kag City Health Office, daw halos wala na sang alagyan ang tubig sa nasambit nga creek bangud ginapunggan ini sang mga sagbot sa suba.
Ginsiling ni Atty. Karol Joseph Chiu, pamuno sang CLO nga may mga residente nga naga-istar sa kilid sang suba kag naandan na nila nga sa suba maghaboy sang ila mga basura.
Ginmaduan gilayon sang CLO ang mga punong barangay nga hugoton ang pagbantay sa amo nga suba agud malikawan ang pagpang haboy sang basura.
Suno naman kay Dr. Grace Tan, pamuno sang Environmental Sanitation Division sang CHO, kinahanglan masolusyonan ang amo nga problema bangud posibli nga magdala sang mga masakit sa residente ang sitwasyon sang nasambit nga mga creek.
Dugang pa niya, likawan man ang pagbutang sang basura sa kilid sang suba bangud gina-anod man ini kun mag ulan ukon magtaas ang tubig.
Pangabay naman sang siudad sa pumuluyo, ipabilin ang katinlo sang suba agud indi ini mag-awas kon mag bunok ang ulan.
“So kinanlan ma participate gid ang tanan nga indi mag dump garbage. Kag also indi magbutang sang basura near the creek para kon mag ulan kag hangin indi paglupadon sa suba”, suno kay Tan.
[sibwp_form id=1]