Kun gina-endorso man ni Governor Eugenio Jose Lacson ang iya kasumpong nga si Board Member Anton Occeno, diresto na ini sang gobernador.
Ini suno kay 5th District Congressman Dino Yulo. Tigaylo ginapasalamatan pa sang kongresista ang tikang sang gobernador.
Bilang reaksyon sa pag-endorse ni Governor Lacson kay Board Member Occeno sa pag ka congressman sa 5th District suno kay Congressman Yulo ginapasalamatan niya ini bangud ini ang nagpukaw sang balatyagon sang iya nga mga supporters sa Kinto Distrito.
Sila-sila na ang nagkampanya para sa iya suno kay Yulo.
Mahimo nga naluoy naman lang mismo ang mga pumuluyo sa iya.
Ginsiling ni Governor Lacson nga dala sang alliance sang mga partido kag pag hinyo man mismo ni Governor Reynaldo Tamayo nga amo ang presidente sang Partido Federal ng Pilipinas ukon PFP kag Presidente man sang Governor’s League, iya nga gin-endorse si Occeno kag katapo sang PFP.
Si Yulo ang katapo sang Lakas nga kabahin man sang alliance.
“Kanya-kanyang diresto man na. Gina respeto ta man si governor. Siling ko na gani nag pasalamat kita kay nakita man nakon ang pagbuylog, siguro na luoy man ang pumuluyo sa akon. When we started 3 years ago. Ginbag-o naton ang dagway sang pulitika labi na gid sa serbisyo sang isa ka congressman. Indi ko magpati nga wala ta nakatanum sa balatyagon sang pumuluyo amo na pinaka importante nga aton sila napabatyag sang aton serbisyo”, suno kay Yulo.