5th District Congressman Dino Yulo ang nagalaum nga basi maka bulig pa man lang ang cloud seeding operation nga ginapaabot gikan sa Department of Agriculture bisan pa nga ulihi na ang aksyon sang natungdan nga ahensya.
Damlag pa ginsiling sang DA Region 6 nga gina follow up sa Agriculture Central Office ni Regional Director Dennis Arpia ang 6 million pesos nga budget para cloud seeding sa bilog nga Western Visayas.
Suno kay Yulo nagapakita lamang ini nga ang problema indi ang seedable clouds kundi ang budget. Dugang pa niya nakahibalo man ang tanan sa proseso sang gobyerno – may bidding pa nga patigayunon, kag basi sa tion nga mahuman na ulihi na ang tanan.
Si Yulo ang madugay na nga nag-lobby para sa cloud seeding operation para maghatag alibyo sa pananum nga tuman nga apektado sang El Nino Phenomenon.
“Amo na ang gina kasubo naton nga masyado gid kaulihi sang aksyon nga nakuha. Kabalo man kita sang proseso sang gobyerno. We hope for the best. Basi pa man lang makabulig. Nasiling na naton the damage has already been done”, suno kay Yulo.
Sang Marso wala sang may nakit-an nga seedable clouds. Karon suno sa DA may yara na, kag bisan pa nga may pag-ulan ulan na ang pag tupa sini indi pa nagakaigo para mabuligan ang mga pananom. Pwede pa makapatigayon sang cloudseeding sini nga mayo tubtob sa tunga-tunga sang Hunyo suno sa DA.
Suno kay Governor Eugenio Jose Lacson sa Lunes maga update sa iya si Arpia kun bala pwede na nga ma download ang budget. Sa bahin sang probinsya, mangin katungdanan sini ang pag coordinate sa CAAP.