Sa una nga adlaw sang MassKara Festival, nagpatigayon sang joint inspection sa Bacolod City Public Plaza si Bacolod City Mayor Greg Gasataya kag Congressman Alfredo Abelardo Benitez, agud makit-an ang ginareklamo sang mga Bacolodnon nga kahimtangan sang plaza sa karun.
Sa pag-assess ni Benitez, lain ang ginpropose nga design sang TIEZA antes pa nasugudan ang kuntani pagpatahum sang plaza kag wala ini nagsanto sa resulta sang pag-obra sang contractor.
80 million pesos ang pondo sang TIEZA para diri. Pagklaro sang TIEZA, wala pa madala sa amo nga budget ang landscaping sa palibot sang plaza.
Personal naman nga ginpondohan ni Benitez ang pagpinta sang salog sang mga quadrants sa plaza agud mabalik ang hitsura sang plaza, antes pa ini ginkaayo sang TIEZA.
Suportado man ni Benitez ang panindugan ni Gasataya nga indi pagbatunon ang pagturn-over sang TIEZA sang plaza kun indi pa ini makaayo sang insakto.
Sandig sa proposed concept sang TIEZA, may light show dapat sa plaza kun gab-i, kun sa diin daw nagasaot ang mga suga kag fountains kaangay sa iban nga mga pungsod.
Apang natukiban man sa una nga pag inspect sang siudad, nga kun paandaron ang fountain sa tunga sang plaza, nagadanaw man ang palibot bangud wala ini sang nagakaigo nga drainage system.
Kagab-i, nakigsapol na si Benitez kag Gasataya sa mga tiglawas sang TIEZA agud mahatagan sang solusyon ang problema.
Dugang naman ni Gasataya, madamo pa sang kinahanglan nga kaayohon sa sulod sang plaza.
Nagpasalig na ang TIEZA sa organizer sang MassKara nga sa Oktubre 4, ila na kakason ang mga board ups sa palibot. Magasugod ang mga aktibidad sang MassKara Festival sa plaza sa Oktubre 9.
[sibwp_form id=1]