Sa ika duha nga adlaw sang kampanya sa Barangay kag SK Elections, Commission on Elections ang nag patuman sang operation Baklas.
Sa Bacolod City, mga tarpaulin kag iban pa nga campaign materials nga wala sa designated nga poster areas ang ginpangkakas.
Ehemplo ang mga yara sa poste ukon sa mga kahoy.
Suno kay Provincial Elections Supervisor Ian Lee Ananoria, isa ini ka simultaneous activity kag sa Oktubre 27 ang madason nga operation baklas.
Pero sarang naman makapatigayon ang tagsa ka Election Officer sang separado nga Operation Baklas sa ano man nga oras.
Indi lamang ang mga wala sa common poster areas ang pangkakason kundi pati man ang mga wala naga sunod sa size nga nasaad para sa mga campaign materials.
Ang wala nabutangan sang “paid for” nalakip man sa pangkakson.
Depende naman sa election officer suno kay Ananoria kun pasakaan sang reklamo ang mga yadtong nagsupak.
Samtang, nagdangat na sa 157 ang show cause order nga naserbe sang probinsya angut sa premature campaigning.
Ang walo nga nagdugang ang gin serbe sa mga kandidato sa La Castellana.