Gin bisita kag gin-inspect sang Commission on Elections Negros Occidental ang mga alternative polling centers sa mga botante nga apektado sang bulkan Kanlaon sa La Castellana, Bago kag La Carlota City.
Gikan sa tatlo ka LGU, may malapit sa 5,000 ka mga bumuloto ang apektado.
Personal nga ginbisita ni Provincial Elections Supervisor Ian Lee Ananoria sini lamang ang mga alternative polling centers.
Ang napili nga mga eskwelahan suno sa iya ang yadtong mga malapit man sa mga evacuees.
Kay indi naman gid sila makabalik pa sa ila nga mga puluy-an dala sang sitwasyon sang bulkan Kanlaon, suno sa COMELEC, sila ang maga boto kun diin sila napahamtang, rason nga ang mga malapit nga eskwelahan ang ginhimo nga alternative polling centers.
Ang mga eskwelahan nga gina tiniran man sang evacuees nga sadto naga serbe man polling center ginpangitaan man sang bulos.
Kun wala na gid maga pahamtang sang daw tolda nga maga serbe makeshift polling center suno kay Ananoria.
Ang La Castellana National High School ang nabisita ni Ananoria sang Miyerkules.
Sa eskwelahan naman sa Ma-ao ang alternative polling center sang evacuees sa Bago kag ang sa La Carlota ang malapit man nga eskwelahan sa evacuation center suno sa COMELEC.
Ang pag kambyo sang polling center ang gina aprobahan sang en banc.
“May notification lang kami ang approval from the en banc pero go na na siya. Kay indi naman sila kabalik per OCD, dira na sila mag May 12 Elections, so dira na sila maboto sa polling centers”, suno kay Ananoria.
718 ka bumuloto sa La Carlota ang apektado suno sa COMELEC, 2,116 naman sa La Castellana kag 2,112 naman sa Bago.
Suno kay Ananoria sa contigency plan sang COMELEC, may duha ka iban pa nga LGU nga mahimo ma apektuhan man kag ini ang nagalakip sang Pontevedra kag Murcia.
Enkaso nga may evacuation man nga matabo gikan sa Pontevedra kag Murcia, gina project magadangat sa 12,479 tanan ka botante ang ma apektuhan.