Nagapabilin nga daku ang potential sang coffee industry indi lamang sa probinsya kundi sa bilog nga pungsod.
Suno kay Christian Marc Romay ang Chairman sang Negros Occidental Coffee Council, sa bilog nga pungsod, naga import ang Pilipinas sang mga 80 tubtob 85 porsiento sang gina konsumo nga kape.
Nagakasayuran nga 15 percent lamang sa gina konsumo ang gikan sa local production.
Pero sa karon wala pa sang datus nga available bahin sang production kag sa gina konsumo man nga kape sa Negros Occidental.
Sa nag bukas nga Coffee Fiesta sini nga Biyernes sa Ayala Malls Capitol Central, ginsiling ni Romay nga isa sa ila nga tinutuyo ang makapatigayon man sang coffee summit para tigayon maka kuha sang pat-od nga datus nga mangin makahulugan sa pag sanyog sang industriya.
May 22 ka mga coffee shop ang nag pakigbahin.
May mga naka schedule man nga talks.
Tuyo sang Coffee Fiesta nga maga serbe nga venue sa tanan nga coffee stakeholders humalin sa producers pakadto sa consumers agudto nga ma taytayan ang ano man nga gap.
Ang coffee farmer nga si Rogelio Claridad Jr., nga nangin rank 1 sa 2025 Regional Coffee Quality Competition sa Region 6 naga siling nga daku ang potential sang coffee farming kag sarang gid nga mangin palangabuhian.