Malawig pa ang ulubrahon kag lubos nga ma-clear ang Ibid Creek sa Biaknabato sa La Castellana.
Ini suno kay Punong Barangay Joselito Martinez Jr., nga nag siling nga sila ang naga pasalamat sa heavy equipment nga gin padala sang probinsya sang Negros Occidental para padayon nga clearing operation sang Ibid Creek.
Pero sa kadamo sang natampok nga mga debris, suno kay Martinez yara pa lang sa naidalom nga bahin ang pag patigayon sang clearing operation kag wala pa matandog ang sa naibabaw nga bahin.
Kun ang ulan maga gikan sa naibabaw nga bahin ini ang gina kabalak-an nila bangud sang posibilidad sang pag daludo sang tubig labi na kun mag lihis ini sa dapat gina agyan bangud ini ang naga tuga sang pag baha.
Suno kay Martinez, amat-amat naman nila nga na relocate ang mga apektado nga pamilya. Sang pag baha dala sang bagyo Queenie suno kay Martinez kun sa diin pito ka mga balay ang na apektuhan, tigayon na nila nga na relocate ang pamilya sa mga tents nga gin hatag sang Office of the Civil Defense.
Damlag pa, may mga na relocate na sila nga pamilya nga na-igo sang bagyo Tino kasubong man ang yadtong naga puyo sakop sang 4km permanent danger zone sang bulkan Kanlaon.
Padayon man nga ginakaayo karon sang Department of Public Works and Highways ang Calapnagan Bridge nga damlag pa na ab-ab.
“Dugay pa gid siya kay ang gina clear subong ari lang sa lower part. Ang upper part sang amon barangay wala pa gid natandog kay ang gina pangayo gid tani namon medyo duludalagko nga heavy equipment kay ang ari diri indi kaya ang dalagko nga bato,” suno kay Martinez.
[sibwp_form id=1]