Sang Hunyo 12, naalarma ang pila ka mga personnel sang Public Order and Safety Office sang pina-gabot sang mga personnel ni Portia Familiaran nga misis ni Vice-Mayor El Cid Familiaran ang pila ka mga tanom sa kilid kag atubang sang Bacolod City Government Center.
Ini ang gilayon nga gin-report sang pamunuan sang Office of the Building Official sa pulis.
Ginsiling ni City Legal Officer Karol Joseph Chiu, gina-usisa na nila ang insidente para sa posible pagpasaka sang kaso sa mga responsable sa pagpangabot sang tanom.
Pero sa Facebook post ni Familiaran, iya ginpaathag nga iya lamang ginkakas ang mga laya kag sobra na ka dalagko nga mga tanom kabangdanan nga kinahanglan mapatuman ang adjustment sa landscaping.
Ginpatpat niya nga mismo si Mayor Albee Benitez ang naghinyo kag nag-appoint sa iya sang 2023 para pamunuan ang Clean and Green Program rason nga personal niya nga gingastohan ang mga tanom kag pagpatahum sang palibot sang BCGC.
Tubtob karon wala sang pormal nga deed of donation, kontrata kag bisan reimbursement sa iya nagasto gani nagapati siya nga indi makabig iligal ang tuyo nga pagsaylo sang mga tanom nga iya man personal nga advocacy kag pinangabudlayan. Indi niya naman luyag hibaluon pa ang motibo sa tuyo nga pag-guba sang iya reputasyon ilabi na nga manugbiya na sa pwesto ang iya bana bilang bise-alkalde.