Ginkumpirmar ni Mayor Albee Benitez upod sa City Health Office ang una nga kaso sang Mpox sa Bacolod.
Dungan sini ang pasalig sang Bacolod LGU paagi sa hugot nga coordination upod sa Department of Health nga napatuman ang ginakinahanglan nga tikang batuk sa makalalaton nga balatian.
Ang pasyente ang yara na sa stable condition kag hugot nga gina-monitor sang City Health Office upod sa Corazon Locsin Montelibano Memorial Regional Hospital kun diin ginatatap kag na-isolate ang pasyente.
Ang tagdumalahan sang ospital upod sa CHO nagapasalig nga wala sang dapat ikaalarma ang publiko.
Sa baylo ila gina-abisuhan ang tanan nga padayunon ang hugot nga pagpatuman sang proper health protocols, proper hygiene kag kun may mga nabatyagan nga sintomas kaangay sang Mpox ang gilayon nga magpakonsulta.
Nagapati ang alkalde nga nalampuwasan na sadto sang siudad ang mga kasubong nga pagtilaw kag liwat ini nga malampuwasan paagi sa pag-ugyon kag mangin mabinantayon.
Ginapasalig man ni incoming Mayor Greg Gasataya ang ginakinahanglan nga assistance sa pag-atubang sang sitwasyon sa pagpanguna sang CHO.
Samtang, ginpahayag naman ni Provincial Health Officer, Dr. Girlie Pinongan nga wala sang kaso sang Mpox sa Negros Occidental. May na-monitor nga suspected Mpox case pero ang laboratory test sang pasyente ang nag-negatibo sa Mpox.