37 anyos nga pumuluyo sang EB Magalona ang gin-report napatay bangud sang cholera. Gindeklara naman ni Mayor Marvin Malacon ang cholera outbreak sa tatlo ka apektado nga mga Barangay sa EB Magalona.
Ang kaso sang 37 anyos nga lalake nga gikan sa sa Hacienda Manalo 5 sa Barangay Tanza sa EB Magalona ang ika duha nga cholera death nga na report sa probinsya.
Napatay siya bangud sang septic shock gikan sa infectious diarrhea kag severe dehydration sadtong Oktubre 11. Na admit siya sa Teresita Jalandoni Provincial Hospital sa Silay sadtong Oktubre 10.
Sa pahayag ni Mayor Malacon, apat ang kaso sang cholera sa ila banwa, duha gikan sa Brgy Tanza, kun sa diin isa ang napatay, tig-isa sa Brgy 3 kag Batea.
Ang pinaka bag-o nga kaso ukon ang ika-apat nga kaso sang cholera sa banwa isa ka 60 anyos nga lolo nga gikan man sa Hacienda Manalo 5 sa Barangay Tanza kag na admit sa Silay Provincial Hospital sang Oktubre 13 kag nakitaan sang “heavy growth of Vibrio cholerae bacteria”.
Na discharge naman sa ospital ang isa ka 30 anyos nga babaye kag isa ka duha ka tuig nga bata nga amo ang mga una kag ika duha nga kaso sang cholera sa EB Magalona.
Ginapasalig ni Malacon nga napatuman na sang banwa ang naga kaigo nga tikang para mapamatukan ang paglapta sang cholera. Nabisitahan naman ang mga pumuluyo sa amo nga mga lugar kag ginpahanumdom nga dapat ipasiguro nga matinlo ang ila tubig kag pagkaon.
Suno kay Provincial Health Officer, Dr Ernell Tumimbang, sa karon nagsaka sa dose ang cholera cases sa probinsya kag ini ang tanan gikan sa District 3 kag mga coastal barangay. Duha sa dose ka cholera cases ang napatay.
Sa record sang Provincial Health Office, ang Silay City may 5 recorded cases kun sa diin isa ang napatay, ang Talisay duha ka cholera cases, ang Victorias may isa kag ang EB Magalona may apat kag isa ang napatay.
Sa napulo ka water sample nga kabahin sang una nga batch nga gin padala sang PHO sa Research Institute for Tropical Medicine, isa lamang diri ang nagpositibo sa cholera kag ini ang gikan sa EB Magalona.
Pero ang nabilin nga siyam ka water sample suno kay Tumimbang ang nagpositibo man sa bacteria nga naga tuga sang acute diarrheal diseases.
Nagpadala naman sang bag-o sa water sample ang PHO kasunod sang bag-o nga mga kaso sang cholera pero ginahulat pa ang resulta.
Nagapahanumdom ang probinsya sa mga pumuluyo nga mag mangin matinlo, ipasiguro nga safe ang water sources nga naga lakip sang water refilling station, ang pag panghanda sa pagkaon lakip na ang gawi. Padayon man ang kampanya sa zero open defecation.