Indi lang mga golden crowned flying foxes nga ginakabig na endangered species ang luyag pangapinan sang Bacolod LGU sa natalupangdan nga bat colony sa Purok Paglaum sa Barangay 30.
Gani ginmanduan na ni Mayor Albee Benitez ang pamunuan sang City Health Office sa paghimo sang tikang para malikaw ang mga pumuluyo sa posible epekto sang bat colony sa ikaayong lawas sang mga residente nga nagapuyo malapit sa puno sang lunok nga ginahukmungan sang masobra isa ka libo nga mga fruit bats.
Ginsiling ni City Health Officer Dr. Carmela Gensoli, makabig nga rabid ang mga cabug gani importante nga makahimo sang tikang nga mapaiway ang mga residente sa higko kag posible kagat sang cabug.
Ang City Engineers’ Office ang maga-himo man sang plano agud nga mapangapinan ang colony kasubong man ang mga residente.
Tinuig na nga nagapabilin ang bat colony sa puno sang lunok nga yara sa bakante nga compound.
Ang pamunuan sang Provincial Environment and Natural Resources Offices nagapaandam sa publiko nga ipaiway ang pagsakit kag pagtublag sang flying foxes sa amo nga compound.