Tigayon na nga na file ang kaso nga 2 counts of murder batuk kay alias Jimmy, ang nagtiro sa iya utod nga si Sonny kag ka sosyo sini sa negosyo nga si Peter sang tinalikad nga Biyernes, sa Brgy. Bubog, sa Talisay City. Lunsay mga Chinese Nationals ang tatlo.
Suno kay Police Major Rhazl Jim Jocson, Deputy Chief of Police sang Talisay City PNP, ang nagaserbe nga complaining witness amo ang kasosyo man sa negosyo sang mga napatay nga Chinese National.
Biyernes sang nagpadulong si Jimmy sa AU&Sons nga compound kag nakig sugilanon sa iya utod nga si Sonny pero dugay-dugay nakabati na lang sang lupok ang mga empleyado. Pagwa niya sa conference room gintiro niya naman si Peter.
Napatay ang duha ka mga biktima.
Natabuan nga may checkpoint ang Talisay PNP malapit sa lugar amo kun ngaa naaresto gilayon ang suspek kay nakapanugid sa mga pulis ang mga empleyado.
Sa imbestigasyon sang PNP may inaway na nga daan ang mag-utod kay napa blotter na sadto ni Sonny si Jimmy bangud sang pagpanakit sa iya. Gin-restrict na ang suspek nga makasulod sa compound pero liwat nga nagbalik sang Biyernes kag natabo ang pagpaniro.
Ginsiling sang mga empleyado nga may utang ang suspek sa biktima. Pagbaligya sang construction materials ang ila nga negosyo.