Ginpasakaan na sang kaso nga qualified trafficking ang duha ka mga Malaysian national nga nadakpan sa Barangay Singcang Airport sa siyudad sang Bacolod sang nagligad nga semana.
Suno sa hepe sang Bacolod City Criminal Investigation and Detection Group Police Major Noel Josol, nagtupa sa qualified trafficking ang ila kaso bangud sa forced labor kag false job offer.
May lima tanan ka mga tagreklamo ang CIDG batuk sa duha.
Target sang love scam ang mga foreign nationals gikan sa nagkalain-lain nga lugar sa kalibutan.
Naga kilal-anay sila sang mga scammers nga gina recruit sang duha ka Malaysian.
Kun mahulog na ang ila buot gina pangayuan sila sang kwarta kag kun maisahan na kag makuhaan sang kwarta, indi na nila ma contact ang ila ka relasyon online.
Nadiskubrihan sang CIDG nga may dating site nga gina-manage ang isa Chinese national sa pungsod China kag posible upod ang duha ka Malaysian national.
Ang CIDG ang padayon pa nga nagatipon sang dugang nga ebedensya para mapasakaan pa gid sang dugang nga kaso ang duha.