P2.1B nga pondo para sa centralized Command Center Project sang Bacolod indi kinahanglan sang dugang nga loan.
Kabahin sang digitalization program sang Benitez Administration ang ginasuguran nga construction sang centralized command center sa Barangay Taculing.
Nalakip sa build-tranfer and maintain agreement upod sa High Data Infra Corporation ang pagtalana sang P2.1B nga pondo para sa digital infrastructure nga magalakip sang pag-install sang indi magnubo sa 150 ka mga CCTVs kag intelligent lamp poles para mapabaskog ang emergency response kag seguridad.
Ginapaabot nga paagi sa proyekto mapadasig ang government transaction kag processes paagi sa digitalization kag comprehensive Geographic Information System.
Ginklaro ni Councilor Al Victor Espino nga pamuno sang Committee on Urban Planning, Development and Basic Facilities sang konseho nga indi kinahanglan sang Bacolod LGU nga mag-loan para sa amo nga proyekto.
Sa idalom sang ginadihon nga kontrata nga magalawig sa napulo ka tuig ginakinahanglan sang siudad nga magpain sang kapin P200M nga pondo kada tuig para diri.
Ang centralized command center project ang nalakip sa mga priority programs sang siudad para sa ginatukod nga supercity.