Tagdumalahan sang Hacienda San Antonio Dos sa Barangay Dos Hermanas sa Talisay City ang nagtanyag sang 10,000 pesos nga cash reward sa kun sin-o man ang makahatag sang impormasyon para madakup ang ginasiling security guard nga gina alegar nag pamahug kag nagpalupok sang armas sa anak sang isa ka Agrarian Reform Beneficiacy.
Karon lamang naka pa gwa sang opisyal nga pahayag ang tagdumalahan, sa natabo sadtong Enero 31 kun sa diin ang video sang pagpalupok sang armas sang lalaki nga ginkilala sang PNP kay Jose Alonsaga, ang gin pasa-pasahan sa social media.
Suno kay Atty Robert Torres ang abogado sang tagdumalahan, si Alonsaga, ang indi konektado sa ila nga kumpanya.
Gina panawagan nila ang Talisay City PNP nga padasigon ang pag aresto sa iya.
Klaro ni Torres ang 15 ka ARB ang kabahin sang 26 ka ARB nga nagbaton sang CLOA sang 2001 para sa isa ka 50-hectare property nga gina panag-iyahan sang negosyante nga si Paul Chang.
Ang gina dispute nga mga 20-hectare property sa Hacienda San Antonio Dos sa karon ang liwat nga gina panag-iyahan ni Paul Chang.
Ini matapos ang 15 ka mga ARB ang nag baligya sa iya sang natungdan nga propiedad paagi sa separado nga notarized Sales of Rights sa nagkalain-lain man nga mga petsa humalin sang November 2013 kag November 2016 suno kay Torres.
Paathag niya ang mga duta nga na angkon sang mga ARB paagi sa CARP ang sarang mabaligya makaligad ang napulo ka tuig humalin sang pag install sa ila.
Damlag pa ginsiling sang Task Force Mapalad nga gin-lease back sang mga farmers ang ila nga duta kag luyag nila nga mabawi ini.
Nagapanawagan ang Hacienda San Antonio Dos, sa otoridad nga ipatuman ang laye kag subong man sa publiko nga binag-binagon ang mga naga gwa nga istorya para indi mangin biktima sang gina tawag fake news.