Temporaryo nga ginkakas sang pamunuan sang Barangay 12 sa Bacolod City ang napulo ka mga canopy nga ginatukuran sang ila nga Trade Fair sa Rizal Street.
Ini bangud sa paglapas sang barangay sa mga pagsulundan nga nakasaad sa ila nga special permit.
Ginsiling ni City Administrator Atty. Mark Steven Mayo, nga ginahaylo ni Mayor Greg Gasataya ang punong Barangay nga mag proseso sang partial road closure ukon i-amend ang ila nga special permit agud makabalik na sila sa amo nga lugar.
Dugang ni Mayo, ginkasugtan na sang siudad kag sang barangay nga pwede sila maka extend tubtob tatlo ka metro gikan sa sidewalk.
Sa karun, nagahulat pa ang siudad kon magsabat ang barangay sa amo nga panawagan.
Sandig sa special permit sang Barangay 12 nga gin-approve sang Sanguniang Panlungsod, ginatugutan ang mga vendors nga magpa tigayon sang trade fair humalin Abril 15 tubtob Hunyo sini nga tuig.
Ini ang kabahin sang paalabuton nga pyesta sang barangay sa Hunyo 24.
Madumduman man nga sang Abril 16, nagtuga sang mainit diskusyon sa tunga ni Atty. Reuben Sabig, pamuno sang Bacolod Traffic and Transport Management Department kag ni Barangay 12 Punong Barangay JR Alcantara ang pagpahalin sang CLO sa mga istruktura sa trade fair sang barangay nga nagalapaw sa kilid sang dalan.*
[sibwp_form id=1]