Handa nga magpasaka sang kaso ang Bacolod City Police Office batuk sa mga naga prank call kag nagapamahog sa mga eskwelahan sa siudad.
Ini ang ginpahayag ni BCPO Director Police Colonel Eugene Rebadomia matapos nga may isa ka persona ang nagtawag kahapon sa 911 kag nag-report nga may bomba sa sulod sang isa ka eskwelahan sa Barangay Pahanocoy, Bacolod City.
Gilayon nga ginkadtuan sang kapulisan ang eskwelahan, apang wala man sang bomba nga may nakita.
Sang gintawgan liwat sang kapulisan ang numero sang nasambit nga persona, wala na ini nagasabat, rason nga ginakabig ini sang kapulisan nga hoax call.
Suno kay Rebadomia, ginaseryoso sang kapulisan ang tanan nga mga tawag sa ila kag ginapangabay niya ang publiko nga indi paghampangan ang pagtawag sa 911.
Gina-trace na sa karon sang kapulisan ang numero nga gingamit sa prank call.
Ginkalipay man sang kapulisan ang systema sang natungdan nga eskwelahan bangud pag-abot sang kapulisan, natipon na ang mga estudyante sa isa ka safe nga lugar antes ini ginpapuli sang udto.
Dugang niya, antes paman ang gina-alegar bomb threat, may isa pagid ka insidente ang natabo sa amo nga eskwelahan kun sa diin may isa ka pagpamahog ang ginpadala sa social media batuk sa isa ka maestra.
Sa isa ka statement, ginpakamalaot ni Bacolod City Mayor Greg Gasataya ang insidente nga nagtuga sang panic sa mga eskwelahan sa siudad.
Ginahandaan na sang siudad ang paghatag sang mga handheld metal detector kag walk through metal detectors sa mga eskwelahan.
[sibwp_form id=1]