Nagpalupok sang isa ka explosive device ang katapo sang Bacolod City Police Office kaupod ang nagkalain-lain nga ahensya bilang kabahin sang ginpatigayon nga bomb explosion incident simulation exercise sa Bacolod City Public Plaza Hwebes sang aga.
Ini agud ma assess sang otoridad kun ano sila kahanda mag responde hinali nga may kaangay sini nga insidente nga matabo sa three-day highlights sang MassKara Festival sumugod bwas nga adlaw.
Ginpahayag ni Police Lieutenant Colonel Albart Tare, Commander sang Site Security Task Force sa Bacolod City Public Plaza nga sandig sa assessment, 100 percent ready na ang kapulisan para sa highlights sang MassKara.
Suno kay Tare, in place naman ang tanan nga kapulisan agud masiguro ang katawhay sa nabilin nga mga adlaw sang MassKara.
Masobra sa 2,000 ka mga police personnel ang yara sa karon sa mga festival sites kaupod ang mga emergency responders kag volunteers agud masiguro ang katawhay sang selebrasyon.
Ginpangabay man ni Tare ang mga festival goers nga likawan nalang ang pagdala sang mga butang nga ginadumilian sa sulod sang mga festival sites kaangay sang mga matalom nga bagay.
Sa Sabado kag Domingo, pagasirad-an na ang dalan Hernaez nga magaserbe bilang holding area sang mga dancers, kag magasugod ang parada sa Araneta Street liko sa Luzuriaga Street pakadto sa venue sa SM City Bacolod para sa Arena Dance Competition.
[sibwp_form id=1]