Sa pagsinapol sang katapo sang Baciwa-Primewater board of directors upod kay Mayor Albee Benitez naistoryahan ang problema angut sa non-revenue water ukon nauyang nga supply sang tubig tuga sang mga leakages sa mga pipelines.
Suno sa alkalde wala sang may napakita nga blueprint ukon design plan sang mga pipelines sang water distribution utility.
Amo nga nagmandu siya para sa reconstruction sang blueprint agud mapat-ud ang paghatag solusyon kag mga ginakinahanglan nga repair sa mga pipelines nga may diperensya.
Ang leakages isa sa mga kabangdanan kun ngaa apektado ang water supply sang Baciwa-Primewater.
Masami ginareklamo man sang mga konsumedor ang kolor ice tea kag kape nga supply sang tubig nga nagalab ot sa ila nga gripo.
Ang pamunuan sang Baciwa-Primewater ang nagpabutyag naman nga may yara na sang negosasyon para sa surface water supply nga magahatag solusyon sa kakulang sang tubig.
Pero may plano man si Benitez nga mangita sang dugang nga water concessionaire para masabat ang problema sa water supply sa siudad.