Amat-amat na nga ginapatukod ang stage kag mga bleachers sa dalan sa gwa sang SM City Bacolod nga mangin venue sang ika 47 nga MassKara Festival Street kag Arena Dance Competitions sa Sabado kag Domingo.
Apang sini nga hapon, liwat nga na eksperyensyahan sa lugar ang pagbaha dala sang pag-ulan. Gilayon man ini nga nag tahaw matapos ang ulan.
Samtang, nagapadayon naman ang pagpatukod sang mga stage kag kiosk sang nagkalain-lain nga brands nga maghatag man sang kasadyahan sa Lacson Tourism Strip.
Magasugod ang mga aktibidad sa Lacson sa Oktubre 16 tubtob na sa katapusan sang MassKara sa Oktubre 18.
Nakahanda naman ang kapulisan suno kay Bacolod City Police Office Director Eugene Rebadomia sa mga posible nga insidente sa highlights sang selebrasyon.
Suno sa iya, bastante sa presensya sang kapulisan ang mga festival sites kag handa ang mga ini mag responde sa tanan nga mga insidente.
Nag panugyan naman ang Police Regional Office Negros Island Region sa mga festival goers nga indi mag patama inom sa dalan, kag likawan ang pagdala sang mga ginadumilian nga mga bagay.
Sumugod Oktubre 1 tubtob sini nga adlaw, wala pa sang may na rekord nga insidente ang kapulisan sa sulod sang nga festival sites.
May masobra sa 2,000 ka mga kapulisan ang yara karun sa mga festival sites kaupod ang pila pagid ka mga ahensya agud mapabilin ang kahilway sang selebrasyon.
[sibwp_form id=1]