Ginpakita sang Bacolod PNP kun ano ang pwede matabo sa mga grupo ukon individual nga may malain nga buko sa nagahilapit nga BSKE kag Masskara Festival.
Hostage taking, bomb threat kag active shooter on the loose ang pila lang sa mga scenario sang simulation exercise nga ginpangunahan sang Bacolod City Police Office upod sa Bureau of Fire Protection, Coast Guard kag rescue volunteer organizations.
Suno kay BCPO Director Noel Aliño kabahin lamang ini sang simulation exercise agud mapakita ang ikasarang sang enforcement agencies sa pag responde sa mga kasubong nga crisis situation nga sarang magaluntad sa Barangay kag SK Elections dungan sa MassKara Festival sa Bacolod.
Gindugang ni Aliño nga ini ang magaserbe man nga paandam sa mga may malain nga buko sa pinili-ay sa kabarangayan kag tion sang tuigan nga selebrasyon sang siudad.
May masobra man sa 2,000 ka mga pulis kag iban pa nga security personnel ang iga-deploy sa Bacolod kabahin sang pagpasiguro sang matawhay nga BSKE kag Masskara Festival 2023.