Gin-multahan sang siudad sang Sagay sang 250,000 pesos ang tagdumalahan sang barge angut sa pagsupak sang ENIPAS Act may kaangtanan sa molasses spill nga natabo.
Suno kay Atty Ryan Bonghanoy ang City Administrator sang Sagay, tigayon na nga nakabayad sa LGU ang tagdumalahan sang M/T Mary Queen of Charity sang multa may kaangtanan sa pagsupak sa Expanded National Integrated Protected Areas System ukon ENIPAS Act of 2018.
“Gin-charge sila sang fine for violation of ENIPAS Law. Kabayad sila 250,000 sa LGU”, suno kay Bonghanoy.
Sang Miyerkules gintugutan naman ang pagbiya sang amo nga barge gikan sa Old Sagay Feeder Port.
Suno kay Bonghanoy ginsiling man sang Coast Guard nga seaworthy ang amo nga vessel.
Pero sa bahin sang Environmental Management Bureau ila pa gina tun-an kun may dugang nga multa nga ipatuman suno kay Bonghanoy.
Ginsiling ni Provincial Environment and Natural Resources head, Joan Gerangaya magasapol pa sila sa Martes.
Nakasaad man abi sa ENIPAS ACT nga pagsupak ang pag dump nga wala sang clearance sang hazardous substance, pero ginatalakay pa nila suno kay Gerangaya kun makabig nga hazardous ang molasses.
Padayon naman nga ginahulat ang resulta sang water sampling.
Pero wala man sila sang may nakita nga kahalitan nga natuga ang molasses spill nga naglungtad sadtong Agosto 7 nga nag apekto sa mga 1.3 hectares nga sakop sang Sagay Marine Reserve.
Totally dissolved na ang molasses sandig sa assessment sang ila nga divers gikan sa regional office.