Na recover sang otoridad sang Lunes upod ang pamilya sang ginpatay nga si Randy Garsola ang iya sini nga bangkay nga karon tul-an na lang, nga nalubong sa Barangay Riverside sa banwa sang Isabela.
Si Garsola ang gina alegar miyembro sang Central Negros 1 Front sang New People’s Army kag iya man upod sa hublag nga karon nag surrender na amo ang nagtudlo kun sa diin siya ginlubong.
Suno kay Police Captain Joseph Partidas, hepe sang Isabela PNP, gin sugid sang nag surrender nga anay NPA member nga si Ka Ray kun sa diin gin lubong si Garsola bangud isa man siya sadto sa nakasaksi sa pagpatay sa iya.
Suno kay Ka Ray, Oktubre pa sang tuig 2018 ginpatay sang ila man mga kaupod sa hublag si Garsola bangud sa naga ayu ini nga magpuli sa iya pamilya kag wala siya gintugutan sang iya nga kaupod sa pinsar nga basi isugid ni Garsola ang giyu sang hublag sa otoridad.
Siy ang ginpatay sa La Libertad sa Negros Oriental kag ginlubong sa Barangay Riverside sa Isabela nga katupad lang man nga barangay.
Ipaidalom sang pamilya sa DNA test ang tul-an ni Garsola agud ma seguro nga iya gid man nga tul-an ang gin lubong kag na recover.