Shadow

4 ka mga pamilya gin evacuate bangud sang baha

Sa video nga kuha sang isa sa mga residente sang Purok Encarnacion sa Barangay Mansilingan kaina sang aga, makita nga sa ila na mismo nga bentana naga sulod ang tubig baha.

Ang mga gamit sa ila nga ground floor nag utaw utaw. Sila nga mga tagbalay nag kutaw na lang sa baha para masalbar ang ila nga mga pagkabutang.

Ang ila nga mga sofa gindala nila sa mas mataas nga lugar.

Suno sa kay Bernadeth Duerme, ini na ang ila sitwasyon sa kada bubu sang ulan. Basta mag lawigay na ang ulan, ginapakamaayo nila nga mag evacuate na lang bangud may kaingod balay na sila nga napatay kay natumbahan sang pader bangud sang baha.

Sa Jose J. Gonzaga Elementary School sila gindala. May kaupod sila nga mga senior citizens kag kabataan.

Suno sa mga residente humalin sang nagpa pader ang isa ka construction firm sa ila nga tupad amo na sini ang ila nga sitwasyon.

Indi lang ang mga residente ang naga pang handa kada mag ulan, pati eskwelahan nga ila sayluhan naga pang handa man.

Ang college student nga si Marie Layo nagbalik pa sa balay nila nga gina baha para magkuha sang modem sa internet kay may online class.

Humalin kaagahon asta mga las diyes sang aga nag sige ang pagbubu sang ulan pero indi man tuman ka baskog. Sa Bacolod sila lang man ang ginreport nga nag evacuate bangud sang baha.

Secured By miniOrangeSecured By miniOrange