Wala pa sa gihapon makilal-an ang bangkay sang gin-alegar notoryos nga kawatan nga nasapwan malapit sa isa ka meat shop sa dalan Araneta, Purok Gold Medal sa Barangay Pahanocoy, syudad sang Bacolod, kaina sang aga.
Ginsiling ni Police Captain Greeky Cayao, hepe sang Police Station 8, positibo nga ginkilala sang mga residente ang nasambit nga persona nga amo ang nagsulod sa isa ka balay sa nasambit man nga barangay, mga las dos sang kaagahon, pila ka oras antes ini ang nasapwan nga wala na sang kabuhi, mga las 6:30 sang aga.
Suno kay Cayao, matapos maabtan sang tagbalay ang lalaki nga nagtuyo nga mangawat, ginlagas siya sang kapin 10 ka mga pumuluyo apang siya ang nakapalagyo kag nakapanago, tubtob nga nasapwan na lamang ini nga patay na.
Nagasuksok ang lalaki sang Yellow nga T-shirt kag itom nga shorts.. ginabulubanta 40 anyos, kag may kataason nga 5’3” tubtob 5’4”.
Madamo ini sang tattoo sa lawas, lakip na ang “ALO” nga tattoo sa nawala nga kamot sini. Ini nga tattoo, suno kay Cayao, ang nag-match sa tattoo sang kawatan nga nakuhaan sang CCTV footage nga nagsulod sa isa ka construction supply sa Barangay Tangub, sadtong Pebrero.
Na-recover sang kapulisan ang motorsiklo nga ginsakyan sang biktima nga iya ginbilin sa gwaan sang balay kun diin ini una nga ginlagas sang mga pumuluyo.
May pilas nga nakit-an sa lawas sang biktima apang indi pa mapat-ud sang kapulisan kung ini bala ang tuga sang pagtiro ukon pagbuno.