2021 pa wala na may naga puyo sa sini nga balay sa may Carmen Avenue sa Barangay 40 sa Bacolod. Wala naman sang supply sang kuryente nga naga sulod diri. Pero mga las kwatro y medya kaina sang kaagahon hinali na lang nga nag ibwal ang kalayo sa sulod sang balay.
Suspetso sang mga residente sa palibot, ang mga pangayaw nga naga sulod sa amo nga balay ang posible nga rason sa sunog.
Gin trangkahan ang amo nga balay sang tag-iya nga si Atty. Clodualdo Subaldo, Jr., ugaling ginpangitaan sang paagi nga makaigo ang tawo sa tunga sang mga salsalon nga grills kag dira naga agi sa pag sulod sa balay.
Sa inisyal nga imbestigasyon sang BFP, posible nga may nabilin ang mga naga sulod diri nga upos sang sigarilyo ukon iban nga bagay nga naga baga nga amo naman ang gin halinan sang pagdako sang kalayo. Nagdangat sa P60,000 ang halit sang kalayo.
Wala naman naglapta ang kalayo sa katupad nga balay kag dorm bangud sang firewall.
Nagapadayon ang pagpangita sang BFP sang cctv cameras agud mahibaluon kun may naka sulod gid man nga tawo antes nag dako ang kalayo.