Naglinupok samtang nagakasunog ang isa ka balay sa Barangay San Rafael, banwa sang Hinoba-an, Negros Occidental sadtong Domingo sang hapon.
Nag-gwa sa imbestigasyon nga nagsugod ang kalayo sa living room area – sa isa sa ila nga mga electrical appliances nga malapit sa mga botelya nga may unod nga gasolina.
Matapos nag-ibwal ang kalayo, ginsundan ini sang paglinupok.
Wala sang mga nasamaran sa insidente bangud gilayon nga naka-evacuate ang mga naga-istar sa balay antes nagdako ang kalayo kag nagsugod ang paglinupok.
Naglawig sang masobra isa ka oras ang pagpalong sang kalayo sang Hinobaan BFP kag naka-deklarar sang fire out mga las 6:30 sang gab-i.
Kuryente ang ginalantaw sang fire investigators nga isa sa mga gintunaan sang sunog.
Ginabulubanta P648,000 ang halit sang sunog sa amo nga balay. Ginapanag-iyahan ini sang isa ka negosyante.*