Isa ka bag-ong bun-ag nga baby ang nasapwan nga patay sa kalog sa Dumaguete City sang Christmas Day. Kaina isa pa gid ka lapsag ang nasapwan man nga patay sa siudad.
Sa video nga kuha mismo ni Punong Barangay Bencio Tan sang Barangay Daro, makita pa nga naga lutaw sa may kanal sa kilid sang isa ka boarding house ang bangkay sang isa ka bag-ong bun-ag nga lapsag sa Barangay Daro, Dumaguete City Negros Oriental sang Disyembre 25. May nagpahibalo na lamang sa punong barangay nga nakita na lang ang lapsag sang mga residente. Sa latest nga report ginsiling sang punong barangay nga nakilala na ang iloy sang bata kag na admit pa ini sa karon sa isa ka ospital.
Kaina sang aga isa pa gid ka bag-ong bun-ag nga lapsag ang nasapwan sa may daan nga dumpsite sa Purok Yellowtops, Brgy. Candau-ay, Dumaguete City pasado las dos sang kaagahon.
Sa initial report sang barangay, gintawgan ni Brgy. Kagawad Manuel Oira Maquiling ang PNP kag ginpahibalo nga may nasapwan nga bangkay sang isa man ka bag-ong bun-ag nga lapsag sa kilid sang Banica River.
Padayon pa ang imbestigasyon sang PNP sa pagkilala sa ginikanan sang amo nga lapsag.