May 68 ka mga stalls ang bag-o nga satellite market nga ginbuksan sang Victorias City LGU sa Barangay 1.
Nasunog sadto ang daan nga merkado gani gintinguhaan sang siudad nga mapatindugan sang bag-o nga masayluhan ang mga lehitimo nga market vendors.
Nagpasalamat naman si outgoing Mayor kag karon Congressman-elect Javier Miguel Benitez sa supporta sang Negros Occidental Provincial Government nga napatuman ang dugang nga infrastructure project nga makabulig sa padayon nga pag-uswag sang siudad.
Ginbuksan man sang mga city officials ang AI-powered traffic lights nga may camera integration sa Crossing Central malapit sa Osmeña Avenue kag BS Aquino Drive.
Ginapaabot ni Mayor Javi nga makabulig ang bag-o nga traffic lights sa pagpahagan-hagan sang pag-gutok sang lakat sang trapiko kag pagpasiguro nga mangin hilway ang dalanon.
Samtang, ginpangunahan man ni Benitez ang pagbukas sang Sidlak Victorias Media Center sa Victorias Command and Evacuation Center.
Ini ang ginakabig nga central hub para sa multimedia production kag communication.