Pagsaylo sang traffic lights ukon pag-demolish sang illegal structures sa kilid sang dalan San Juan ang ginatugyan na sang alkalde sa City Engineer’s Office.
Bisan si Mayor Albee Benitez ang natingala sang iya makita ang traffic lights nga ginpalusot sa atop sang isa ka payment center sa dalan San Juan.
Ginpakakas na kahapon sang mga opisyales sang Barangay 2 ang mga nagasablag nga tarpaulin, signages kag atop sang payment center.
Ginsiling sang alkalde nga iya na ginatugyan sa pamunuan sang City Engineer’s Office ang pagsaylo sang traffic lights ukon indi gani ang pag-demolish sang mga illegal structures nga naga-sablag sa natakod nga traffic lights.
Ginpaathag ni Bacolod Traffic and Transportation Management Department OIC Patrick Lacson nga antes pa man gintakod sang contractor sang City Engineer’s Office ang traffic lights, gin-istorya na nila ang mga tag-iya sang illegal structures nga kakason ang mga atop kag obstruction nga nagalapaw sa kilid sang karsada.
Nag gwa nga sang ginpalaparan sang DPWH ang kilid sang dalan, pila sa mga residente ang nagtukod sang extension sang ila balay sa bag-o semento nga dalan.