Iga-deploy ang 262 ka mga kapulisan sa nagkalain-lain nga mga patyo sa siudad sang Bacolod bilang kabahin sang preparasyon para sa Tigkalalag.
Suno kay Bacolod City Police Director, Colonel Joeresty Coronica, magasugod ang deployment sang mga kapulisan sa Oktubre 31, Biyernes nga adlaw, agud masiguro ang kalinong kag katawhay.
Sa pihak nga bahin, may 158 ka mga vendors nga nakabaton sang special permits halin sa siudad sang Bacolod para makabaligya sa Hernaez/Libertad, Handumanan, Burgos Market, Burgos Cemetery, San Juan Street, Mabini kag Gonzaga Street.
Magabaligya sila sang mga bulak, kandila, kalan-on kag iban pa nga produkto para sa Tigkalalag.
Dugang pa ni Coronica nga ginadumili-an ang pagdala sang mga matalom nga butang kag mga makahulubog nga ilimnon sa sulod sang patyo agud malikawan ang kinagamo kag masiguro ang katawhayan sa sulod sang patyo.
Damlag pa gin anunsyo ni City Administrator Mark Mayo nga 6am tubtob 10pm lang ang pagbisita sa mga public cemetery.*