Naga-average sa tag dos shientos ang new Covid-19 cases sa Bacolod. Pero sarang pa magsaka sa masunod nga inadlaw suno sa EOC.
May 232 new Covid-19 cases ang Bacolod kagab-i sandig sa record sang Emergency Operations Center.
Kun basehan ang data sang EOC, naga average man sa dos shientos ang dugang nga mga panibag-o nga Covid-19 cases kada adlaw.
Suno kay Dr. Chris Sorongon, deputy for medical data and analysis sang Bacolod EOC, kadam an sa mga nagpositibo asymptomatic kag mild cases kag kalabanan ang nakapabakuna.
Nagapati siya nga masunod nga inadlaw sarang pa magsaka ang kadamuon sang Covid-19 cases.
Nagapabilin naman sa kapin 40 percent ang utilization capacity rate sang ospital sa siudad.
Pinakamataas naman ang 1,834 nga new Covid-19 cases sa Western Visayas kahapon.
Gani mabaskog man nga nagapanawagan ang pamunuan sang Department of Health 6 sa mga may edad kag may mga co-morbidity nga kumpletohon ang pagpabakuna kag kun mahimu magpa-booster shot agud nga mas mapangapinan sa virus.