Bacolod LGU nagpaathag nga delikado kag patay na ang pila ka mga puno sang kahoy nga gin utod sa Bacolod Public Plaza.
Sa pag panghawan sang siudad sa Bacolod Public Plaza nalakip sa napang-utod ang pila ka mga puno sang kahoy.
Bagay nga madamo sa mga netizens ang namangkot kun ngaa kinahanglan pag-utdon ang mga kahoy.
Ginsiling ni Mayor Greg Gasataya nga ang pruning activity ang may yara sang supervision gikan sa DENR.
Ginmando sang alkalde ang pagpahawan kag patuman sang minor repairs sa mga comfort rooms kag iban pa nga pasilidad sa plaza agud mas mapatahum kag mapasanag ini ilabi na kun gab-i.
Ginpaathag man ni City Legal Officer Karol Joseph Chiu nga mga patay na ang mga puno sang kahoy nga makabig peligroso para sa mga nagakadto sa plaza. Gani kinahanglan ini nga mapangkakas.
Kaina may mga personnel sang DENR nga nagpatigayon sang inspection sa Bacolod Public Plaza nga nalakip sa ginakabig green spaces sa siudad.