![](https://i0.wp.com/digicastnegros.com/wp-content/uploads/2023/10/wp-1697108514831.jpg?resize=810%2C456&ssl=1)
Bacolod LGU ginapaabot magapirma sang kasugtanan upod sa SM Prime Holdings Incorporated angut sa Manokan Country Development project ini nga Oktubre.
Matapos nga ma-present sang tiglawas sang SMPHI ang kapin P4B pesos nga development project sa Manokan Country, ginapaabot nga magapa-gwa sang committee report ang katapo sang Sangguniang Panlungsod antes sang natalana nga paghatag man sang approval sa igahinyo nga authority to sign ni Mayor Albee Benitez para sa ginaplano nga public private partnership project.
Suno kay City Legal Officer Atty. Romeo Carlos Ting, Jr., chairman sang P4 Committee, ginapaabot nga antes matapos ang Oktubre sarang matigayon ang signing sang Memorandum of Agreement sa tunga sang siudad kag SMPHI.
Kapin sa 3-hectare ang propiedad sang LGU sa reclamation area nga luyag arkilahan sang SMPHI.
Handa ang proponent nga maghatag sang P132M nga advance payment para sa renta sa sulod sang pito ka tuig kun matigayon na ang MOA.
Ang mga vendors sang Manokan Country ang nagpabor naman sa plano sang SMPHI kun diin mangin prayoridad man sila sa tagaan sang pwesto sa sulod sang ginaplano nga construction sang duha ka mga BPO towers.