Byahe sang fastcrafts kag roro vessel sa mga sea port sa Negros Occidental ang temporaryo nga gin-suspend bangud sang Bagyo Dante.
Subong pa lang kun tani maga balik sa byahe ang mga roro kag fast craft sa mga pantalan sang Iloilo kag Bacolod matapos ang ginpatuman nga travel moratorium, pero liwat na naman nga ginpatuman sang Philippine Coast Guard Bacolod ang suspension of trips tuga sang epekto sang tropical storm nga Dante.
Gani humalin las onse kaina sang aga, apektado man ang biyahe sang mga pasahero sa Bredco kag Banago port pati sa seaport sang San Carlos, Sagay kag Escalante city sandig man sa sea travel advisory sang PCG-Bacolod.
Nalakip sa mga ginapahandumduman ang mga mananagat nga magpaiway anay sa pagpanagat agud malikawan ang ano man nga insidente nga sarang magluntad kag matuga sang malain nga panahon.
Base sa weather bulletin sang PAG-ASA , nalakip sa Tropical Cyclone Wind Signal No. 1 ang northern portion sang Negros Occidental kabahin diri ang San Carlos City, Don Salvador Benedicto, Cadiz, Sagay, escalante city, banwa sang toboso kag calatrava. Amo man ang siudad sang bacolod, talisay, silay kag Victorias pati na ang mga banwa sang EB Magalona, Manapla, kag Murcia.