Matapos may mga empelyado nga nag positibo sa Covid-19, napaidalom sa temporaryo nga lockdown ang isa ka mall kag duha ka bangko sa siudad sang Kabankalan.
Suno kay Mayor Pedro Zayco, sang nagligad nga semana, temporaryo nga nagsira ang Gaisano Mall.
Karon nagbalik bukas ang bahin lamang sini sa idalom sang skeleton force.
Pero nagpabilin bukas ang mga baligyaan sang mga tenants sini suno sa alkalde.
Mga 63 ka mga empleyado suno kay Zayco ang nagpositibo sa virus. Ang mga nagbalik trabaho ang yadtong nag negatibo sa swab test.
Samtang, dose naman ka mga empleyado sang BDO sa Guanzon Street kag isa ka empleyado sang PNB sa Kabankalan ang nag positibo man sa Covid 19. Temporaryo nga nagsira ang duha ka bangko.
May mga ipaidalom pa sa swab test sa PNB. May plano ang PNB nga temporaryo anay magsaylo ang staff sa iban nga branch sa Kabankalan. Mga transaction naman sa apektado nga BDO branch ang ginsalo sang isa pa gid ka branch.
“What we did kay daw ka alarming, ginstorya namon ang management (Gaisano) dira, nag kwan siya sa higher management nila kay indi man maka decide ang branch manager. Nag kwan sila nga i lockdown na lang kag swabon ang ila nga empleyado, ina with all expense sang city government,” suno ka Zayco.