Bacolod Emergency Operations Center ang nagapahanumdum nga ginadumili-an sa gihapon nga magsulod sa mga malls kag commercial centers ang mga bata naga edad 15 anyos panubo kag kasubong man ang mga naga edad 66 anyos pasaka.
Suno sa Deputy for Medical sang EOC nga si Dr. Chris Sorongon, bisan pa nga ginpahayag ni DILG Secretary Eduardo Ano nga pwede na makasulod sa mga mall ang mga kabataan basta upod ang ginikanan ukon guardian, magadepende ini sa gihapon sa lokal nga pangulohan.
Base sa pinaka ulihi nga executive order ni Bacolod Mayor Evelio Leonardia nga nagapaidalum sa siudad sa Modified General Community Quarantine, ginapanugyan sa gihapon ang mga naga edad 15 anyos panubo kag 66 anyos pasaka nga magpabilin sa sulod sang ila panimalay agud indi malatnan sang covid-19.
Gindugang pa ni Dr. Sorongon nga maga deploy man ang EOC sang mga personnel sa sulod sang mall, mga terminal kag iban pa nga mga lugar nga ginadagsa sang tawo para magbantay kun nagasuksuk sila sang face mask, face shield kag nagasunod sa physical distancing.
Ginapaabot sang EOC nga magadamo ang mga tawo nga magagwa sa ila balay sini nga bulan sang paskwa gani dapat nga magdoble sa paghalong ang publiko.